Президент көндәлегеннән
Россия Президенты Владимир Путинның Пакистан халкы арасында зур популярлыкка ия булуы турында РИА Новости Көнчыгыш икътисади форумы кысаларында Ислам Республикасының Россия Федерациясендәге илчесе Фәйсал Нияз Тирмизи сүзләренә сылтама белән яза.
Тирмизи ассызыклаганча, ил халкы Владимир Путинга зур хөрмәт белән карый һәм аның визитын түземсезлек белән көтә. «Без Владимир Путинны кабул итәргә бик шат булыр идек», – дип өстәде дипломат.
Моңа кадәр Фәйсал Нияз Тирмизи Исламабадның 2027 елда Шанхай хезмәттәшлек оешмасы (ШОС) саммиты алдыннан Россия лидерының визитын көтүен белдергән иде. Үз чиратында, Пакистан Президенты Асиф Али Зардари үз иленең Россия белән хезмәттәшлекне ныгытуга тугрылыгын раслады.
* * *
Владимир Путин Кремльдә Россиягә дәүләт сәфәре белән килгән Вьетнам Коммунистлар партиясе Үзәк Комитеты Генераль секретаре, Вьетнам Социалистик Республикасы Президенты То Ламны кабул итте.
Видеоэлемтә аша лидерлар Ханойда Россия-Вьетнам уртак тропик фәнни-тикшеренү һәм технологик үзәге базасында йогышлы авыруларны өйрәнү һәм профилактикалау лабораториясен ачу тантанасында катнашты.
Сөйләшүләр нәтиҗәләре буенча лидерлар Россия-Вьетнам мөнәсәбәтләрен яңа этапта киң колачлы стратегик партнерлык кысаларында алга таба ныгыту турында уртак белдерү кабул итте. Яклар То Ламның Россиягә дәүләт сәфәре кысаларында имзаланган документлар белән алышты.
* * *
Владимир Путин Кытай халык республикасы рәисе Си Цзиньпин һәм Һиндстан премьер-министры Нарендра Моди белән Украина конфликты буенча фикер алышкан һәм аларның Украинадагы хәлләрне җайга салуга үзләреннән өлеш кертергә әзер булуларын хуплаган. Президентның матбугат секретаре Дмитрий Песков журналистларга шул хакта сөйләп үтте.
“Чыннан да, Нью-Делидагы үзара аралашулар барышында председатель Си да, Премьер-министр Моди да Украина мәсьәләсе белән кызыксынды, кирәк булган очракта, үз илләренең конфликтны җайга салуга өлеш кертергә әзер булуларын әйтте. Моны исә Президент Путин бик уңай кабул итте”, – диде Песков журналистларга. Кремль вәкиле билгеләп үткәнчә, теләсә кайсы ил Киевка йогынты ясап, Украинадагы хәлләрне җайга салуга үзеннән өлеш кертә ала.
* * *
Владимир Путин Европа илләре хәрбиләренең Украина территориясенә кертелүе Россия белән турыдан-туры сугыш башлануга китерәчәген белдерде. Бу хакта ул Нью-Делида узган БРИКС саммитында журналистларга әйтте.
Путин Европа илләрендә Украинага хәрби хезмәткәрләр урнаштыру мөмкинлеге турында фикер алышуларга карата фикерен белдерде. «Бу Россия белән сугыш дигән сүз», – диде ул.
Шул ук вакытта Россия Президенты Мәскәүнең Европа илләренә хәрби яктан янамаячагын һәм алар белән конфликт өчен нигезләр күрмәвен ассызыклады.
Путин шулай ук Европада җәмәгатьчелек фикеренең конфликтка алга таба катнашудан борчылуын белдерде. Президент сүзләренчә, Мәскәү Европа дәүләтләре белән турыдан-туры бәрелешкә омтылмый, ә мондый конфликт башлану өчен алшартлар юк.