Гасыр яшьтәше
Николаевка районында гомер кичерүче Бөек Ватан сугышында катнашучының тол хатыны, тыл хезмәтчәне һәм педагогик хезмәт ветераны Сәидә Иняят кызы Салиховага 15 сентябрьдә 100 яшь тулды. Дистә еллар аша узып та, ул күңелендәге яктылыкны, күзләрендәге яшәү чаткысын саклап калган.
Гасыр яшьтәшен юбилейлы гомер бәйрәме белән котларга район хакимияте башлыгы Ольга Аблязова килгән иде. Аларның эчкерсез сөйләшеп утыруы безнең барыбыз өчен дә тормышны, кешеләрне ярату сабагына әверелде. 100 яшьлек Сәидә Иняят кызының зиһене һәм дәрт-дәрманы соклану гына түгел, гаҗәпләнү дә тудыра. Ул тулы канлы тормыш белән яши: өендә үз-үзен карый, урамга һава суларга чыга һәм йорты каршындагы бакчасында бөтен күңелен биреп чәчәкләр үстерә.
Аның озак яшәү сере ифрат та гади: “Әгәр иртән йокыдан торгач үземне бераз начаррак хис итсәм, диванга сузылып ятмыйм - тәмләп чәй эчәм дә, бакчага чыгам. Эш, хезмәт теләсә нинди дарудан да яхшырак дәвалый”,- ди ветеран, бәхетле елмаеп. Аның сүзләрендә - җиңүчеләр буынының бөтен асылы, алар кемнәндер ярдәм көтеп ятмыйча, үзләренең әрсезлеге һәм хезмәте белән барлык авырлыкларны, тормыш сынауларын җиңеп чыгарга күнеккән.
Сәидә Иняят кызының биографиясе - тулы бер дәвернең елъязмасы. Ул 1926 елда Әхмәтле авылында ишле һәм дус-тату Аблатиповлар гаиләсендә дөньяга килә. Ун бала арасында өченчесе булып, тормыш арбасына бик иртә җигелә: 15 яшьлек кыз бала өлкәннәр белән бергә колхоз кырларында тир түгә. Ул тылда чын фидакарьләрчә хезмәт итеп, Бөек Җиңү көнен якынайтучыларның беренче сафларында атлый. Аннары укытучы һөнәрен үзләштереп, бөтен гомерен балаларга белем һәм тәрбия бирүгә багышлый.
Язмыш сынауларын җитәрлек татыса да, Сәидә Иняят кызы гаҗәеп дәрәҗәдә оптимист булып кала. Ул шаярта, көлә һәм йөз елга сузылган тормыш юлының һәр мизгелен яхшы хәтерли. Бүген аның иң зур байлыгы - зур һәм шәфкатьле, мәрхәмәтле гаиләсе. Улы, кызы, оныклары белән оныкчыкларының җан җылысын тоеп, игелекләрен күреп, бәхетле, тыныч картлык көннәре кичерә.
Сәидә Иняят кызына карыйсың да, йөз яшь - ул гади саннар гына түгел икәнен аңлыйсың. Бу - лаеклы, дәрәҗәле булып яшәү, тормышны өзелеп ярату йөзьеллыгы. Төрле елларда аңардан белем алган йөзләгән укучысының олы рәхмәт сүзләре әнә шул хакта сөйли.
Без дә Сәидә Иняят кызын юбилее белән кайнар котлап, бәрәкәтле, хәерле озын гомер, җан тынычлыгы, тагын озак еллар якыннарын шатландырып яшәвен телибез.
И.ХАСИБОВ.